‘श्री राधाकृष्ण संगीत साधना सिंधुदुर्ग’ व ‘स्वयंभू कला क्रीडा मंडळ’ यांच्या संयुक्त विद्यमाने आजगांव येथे संपन्न झाला “राधाकृष्ण चषक २०२४” हा सांगितिक महोत्सव.
सिंधुदुर्ग: आपल्या भारतीय संस्कृतीचा सांस्कृतिक ठेवा म्हणजे आपले अभिजात शास्त्रीय संगीत. हिंदुस्थानी शास्त्रीय संगीताने जागतिक पटलावर आपला ठसा उमटविला आहे. आपल्या जिल्ह्यातही या शास्त्रीय संगीताचा प्रचार व प्रसार व्हावा, शास्त्रीय संगीत शिकणाऱ्या जिल्ह्यातील युवा साधकांना हक्काचं व्यासपीठ मिळावं, त्यांची कला रसिकांसमोर आणुन त्यांच्या कलागुणांना न्याय द्यावा व त्यांना प्रोत्साहित करावं या पवित्र उद्देशाने ‘श्री राधाकृष्ण संगीत साधना सिंधुदुर्ग’ व ‘स्वयंभू कला क्रीडा मंडळ आजगांव’ यांच्या संयुक्त विद्यमाने “राधाकृष्ण चषक २०२४” या सांगीतिक महोत्सवाचे आयोजन श्री देव वेतोबा मंदिर सभागृह, आजगाव ता. सावंतवाडी येथे करण्यात आले होते. या अंतर्गत ‘शास्त्रीय गायन(हिंदुस्तानी ख्याल) स्पर्धा’ व ‘सवेष साभिनय नाट्यगीत गायन स्पर्धा’ घेण्यात आली.
महोत्सवाच्या पहिल्या दिवशी म्हणजेच गुरुवार दि. २३ मे २०२४ रोजी सिंधुदुर्ग-रत्नागिरी जिल्हा मर्यादीत ʼशास्त्रीय गायन(हिंदुस्थानी ख्याल) स्पर्धाʼ संपन्न झाली. कार्यक्रमाचे उद्घाटन मुंबई येथील आंतरराष्ट्रीय किर्तीच्या.. जयपूर अत्रौली घराण्याच्या विख्यात शास्त्रीय गायिका विदुषी श्रृतीताई सडोलीकर मॅडम, राधाकृष्णा संगीत साधनाच्या अध्यक्षा संगीत अलंकार सौ.वीणा दळवी, वेतोबा देवस्थानचे मानकरी श्री दादा प्रभूआजगांवकर, श्री संजय पिळणकर, दशावतर कलावंत श्री नारायण आसयेकर आदी मान्यवरांच्या हस्ते करण्यात आलं. या ‘शास्त्रीय गायन(हिंदुस्तानी ख्याल)’ विभागात प्रथम पारितोषिक रोख ₹ ५५०१/- व ‘राधाकृष्ण चषक’चा मानकरी ठरली सावंतवाडीची कु. सानिका संजय गावडे. द्वितीय पारितोषिक रोख ₹ ३५०१/- व सन्मानचिन्हची विजेती ठरली रत्नागिरीची कु. तन्वी मंगेश मोरे. तृतीय पारितोषिक रोख ₹ २५०१/- व सन्मानचिन्हची विजेती ठरली रत्नागिरीची सार्था नरेंद्र गवाणकर. उत्तेजनार्थ प्रथम ₹१५०१/- सावंतवाडीची कु. विधिता वैभव केंकरे तर उत्तेजनार्थ द्वितीय ₹११०१/-चा विजेता ठरला नाधवडे, वैभववाडीचा हर्ष संजय नकाशे. शास्त्रीय संगीतातील विख्यात गायिका विदुषी श्रुतीताई सडोलीकर मॅडम यांनी या स्पर्धेचं परीक्षण केलं. यावेळी स्पर्धक व संगीत साधकांना मार्गदर्शक अशी श्रुतीताईंची मुलाखत निवेदक श्री संजय कात्रे सर यांच्या माध्यमातून घेण्यात आली.
पारितोषिक वितरण सोहळा अर्चना फाऊंडेशनच्या अध्यक्षा सौ अर्चना ताई घारे, ज्येष्ठ सामाजिक कार्यकर्ते श्री एकनाथ नारोजी, आणि देवस्थानचे मानकरी आणि परिक्षक महोदयांच्या हस्ते करण्यात आला.
या सांगीतिक महोत्सवाच्या दुसऱ्या दिवशी म्हणजे शुक्रवार दि. २४ मे २०२४ रोजी सिंधुदुर्ग-रत्नागिरी जिल्हा मर्यादित “सवेष साभिनय नाट्यगीत गायन स्पर्धा” छोटा गट व मोठा गट अशी दोन गटात घेण्यात आली. स्वामी गगनगिरी महाराज आश्रम गगनगड कोल्हापूरचे विश्वस्त श्री संजयदादा पाटणकर, राजगड रिसाॅर्टचे मालक श्री प्रमोद नाईक, मराठी पटकथा लेखक, चित्रपट दिग्दर्शक श्री संतोष दाभोळकर आदी मान्यवरांच्या हस्ते श्रीं ची प्रतिमा पूजन करून कार्यक्रमाचे उद्घाटन करण्यात आले. या सवेष नाट्यगीत गायन विभागात छोट्या गटातून प्रथम पारितोषिक रोख ₹ ३००१/- व ‘राधाकृष्ण चषक’ ची मानकरी ठरली रत्नागिरीची कु. सार्था नरेंद्र गवाणकर. द्वितीय पारितोषिक रोख ₹ १५०१/- व सन्मानचिन्ह खारेपाटणची कु. प्राजक्ता अभय ठाकूरदेसाई तर तृतीय पारितोषिक ₹१००१/-चा विजेता ठरला आजगांवचा कु. आराध्य आनंद खोत. उत्तेजनार्थ प्रथम ₹७०१ तुळस वेंगुर्ले येथील कु. ज्ञानेश्वरी प्रवीण तांडेल हिने मिळवला.
सवेष साभिनय नाट्यगीत’ मोठ्या गटातून प्रथम पारितोषिक रोख ₹ ५००१/- व ‘राधाकृष्ण चषक’चा मानकरी ठरला नेरूर कुडाळचा हर्षद प्रमोद मेस्त्री. द्वितीय पारितोषिक रोख ₹ ३००१ व सन्मानचिन्ह विजेती ठरली शिरोडा येथील कु. निधी श्रीकांत जोशी तर तृतीय पारितोषिक रोख ₹२००१/- व सन्मानचिन्हची विजेती ठरली वेंगुर्ले येथील कु. गीता सोपान गवंडे. रत्नागिरी येथून आलेली कु. तन्वी मंगेश मोरे उत्तेजनार्थ प्रथम ₹१००१/ची विजेती ठरली तर तळवडे सावंतवाडीचा हेमंत हनुमंत गोडकर उत्तेजनार्थ द्वितीय ₹५०१/- पारितोषिकाचा मानकरी ठरला. या स्पर्धेचे परीक्षणही विदुषी श्रुतीताई सडोलीकर यांनीच केले. यावेळी त्यांनी स्पर्धकांना बहुमुल्य असे मार्गदर्शन केले. या कार्यक्रमाचा पारितोषिक वितरण सोहळा सन्माननीय परिक्षक विदुषी श्रुतीताई सडोलीकर, भजनसम्राट श्री भालचंद्र केळुसकर बुवा, अॅड. दिलीप ठाकुर, सौ. वीणा दळवी आदी मान्यवरांच्या प्रमुख उपस्थितीत करण्यात आला. स्पर्धेसाठी स्पर्धकांना संगीत साथ, हार्मोनियम श्री साहिल घुबे, ऑर्गन श्री भालचंद्र केळुसकर बुवा तर तबला साथ गोवा येथील आदित्य तारी, श्री प्रसाद मेस्त्री, यांनी केली. दोन्ही दिवसाच्या संपुर्ण कार्यक्रमाचे सूत्रसंचालन श्री संजय कात्रे सर यांनी केलं. अनेक संगीत साधकांनी व संगीतप्रेमी रसिकांनी यावेळी उपस्थित राहून कार्यक्रमाचा आनंद लुटला.
कार्यक्रमाचे प्रास्ताविक व “राधाकृष्ण चषक २०२४” हा सांगीतिक महोत्सव यशस्वी करण्यासाठी सहकार्य करणाऱ्या सर्व देणगीदार, पारितोषिकांचे सर्व प्रायोजक, कार्यक्रमाला शुभेच्छा देण्यासाठी उपस्थित असणारे विविध क्षेत्रातील मान्यवर, सर्व सहभागी स्पर्धक, उपस्थित सर्व संगीतप्रेमी, स्पर्धेचे मान्यवर परीक्षक, श्री वेतोबा देवस्थानचे सर्व मानकरी, दोन्ही मंडळांचे सर्व सदस्य, श्री राधाकृष्ण संगीत साधनाचे सर्व विद्यार्थी व त्यांचे पालक वर्ग या सर्वांचे ‘श्री राधाकृष्ण संगीत साधना’चे सचिव श्री हेमंत दळवी यांनी आभार मानले.
