वेंगुर्ले: तालुक्यात आज मध्यरात्री व पहाटे वादळी वाऱ्यासह झालेल्या पावसाने ठिकठिकाणी मुख्य रस्त्यावर झाडे उन्मळून पडल्याने वाहतूक ठप्प झाली आहे.वेंगुर्ले मठमार्गे सावंतवाडी या मुख्य रस्त्यावर आज पहाटे ४.३० वा. आडेली खुटवळवाडी येथे आकेशियाचे झाड पडल्याने वाहतूक ठप्प झाली आहे.सुदैवाने यावेळी एक कार अपघातातून थोडक्यात बचावली.तर स्ट्रीट लाईट पोल वाकून तारांचे नुकसान झाले आहे. सदर वाहतूक श्री देव सोमेश्वर मंदिर मार्गे वळविण्यात आली .तालुक्यात अन्य ठिकाणीही झाडे, विद्युत पोल पडल्याने वाहतुकीस अडथळा निर्माण झाला आहे .मागील आठवड्यात याच मार्गावर जांभरमळा येथील कानू मोरजकर यांचे किराणा दुकानावर वडाचे झाड पडून मोठी नुकसानी झाली होती.या मार्गा दुतर्फा मोठ्या प्रमाणात झाडे जीर्ण झाली असून रस्त्यावर व विद्युत तारांवर लोम्बकळत आहेत.याबाबत संबंधित विभागाने त्वरित लक्ष पुरवावे,अशी मागणी होत आहे.
